ක්‍රිකට් ලොක්කන් බේරන්න 2024 නීතිඥ ගාස්තු වලට විතරක් කෝටි 25 ක් ගෙවලා

ලංකාවේ ධනවත්ම ආයතන අතරින් ප්‍රමුඛ තැනක් ගන්නා ක්‍රිකට් ආයතනය විසින් 2024 වසරේ නඩු කටයුතු වෙනුවෙන් ගෙවා ඇති මුදල පමණක්   රුපියල් මිලියන 250 ක් බව එහි විගණන වාර්තා වල සඳහන් වන බව lankasportsnewsවෙත වාර්තා වෙනවා. 

මින් වැඩි කොටසක් නීතිඥ ගාස්තු වෙනුවෙන් ගෙවා ඇති අතර එයද තෝරාගත් නීතිඥයන් කිහිප දෙනකු අතර බෙදී ගොස් ඇතැයිද රැකව නම් උසාවි නොයන එහෙත් වැඩි කාලයක් ක්‍රිකට් ආයතනයේ කාලය ගත කරන නීතිඥයකුට මිලියන ගණනක් නීතිඥ කොමිස් මුදලක් ලෙස ගෙවා ඇතැයිද වාර්තා වෙනවා.

ක්‍රිකට් ආයතනය වෙනුවෙන් නඩු සඳහා බොහෝ විට කතා කරනු ලබන්නේ රොමේෂ් ද සිල්වා, හා කුවේර ද සොයිසා , රොනල්ඩ් පෙරේරා යන නීතිඥවරුන් වන අතර වරක් රොනල්ඩ් පෙරේරා නීතිඥ වරයාට ගෙවන ලක්ෂ 40 ක් එන්සීසී  ක්‍රීඩා සමාජ ගිණුමට බැර කිරීම හේතුවෙන් එන්සීසී ක්‍රීඩා සමාජ සභාපතිවරයා  සභාපති තනතුරෙන් ඉවත් කිරීමට එහි සාමාජිකයන් පසුගිය වසරේ  කටයුතු කළා.

මීට අමතරව හිටපු ප්‍රබල ඇමතිවරයකු ඇතුළු ප්‍රසිද්ධ නීතිඥයන් කිහිප දෙනකුටම ක්‍රිකට් ආයතනයට විරුද්ධව පෙනී නොසිටීමේ එකඟතාවකට මාසිකව සන්තෝසම්  දීමනාවක් ගෙවන බවත් වාර්තා වෙනවා. එහි වැඩි විස්තර ලැබුණු පසු ඔවුන්ගේ නම් ගම් හා දීමනාවේ ගණන් හිලව් ඔබ වෙත ගෙන එන්න lankasportsnews සූදානම්.

නීතිඥ ක්ෂේත්‍රයේ මෙවැනි ඩබල් ගේම් හා කප්පම් ගන්නා නීතිඥයන් සිටින බව බොහෝ දෙනා නොදන්නා දෙයක්.

ක්‍රිකට් ආයතනය විසින් මෙතරම් විශාල මුදලක් නීති කටයුතු වශයෙන් වියදම් කොට ඇත්තේ ඔවුන්ට එරෙහිව වැටෙන නඩු වලට වඩා සත්‍ය හෙළිදරව් කරන්නන්ගේ කට වැසීම සඳහා ඔවුන් විසින් පනවන ලද Deformation නඩු වෙනුවෙන්.

මෙසේ ඔවුන් නඩු පවරා ඇති අය අතර මැති ඇමතිවරුන් වන රොෂාන් රණසිංහ, අර්ජුණ රණතුංග, හේෂා විතානගේ, නිරෝෂන් පාදුක්ක හා ජන මාධ්‍ය වේදීන් වන කැලිස්ටස් ඩේවි, රෙක්ස් ක්ලෙමන්ටයින්, පැතුම් ශ්‍රී විජේරත්න, නවුෂාඩ් අමිට්, ෆවුස් මොහොමඩ්, යන අය සිටිනවා.

ඒ ක්‍රිකට් විෂමතා හා දූෂණ  ගැන කතා කිරීම හා ලිවීම නවත්වා දැමීමටයි.

ඒ අතර ක්‍රිකට් අරභයා නිලධාරීන්ට ගොනු කෙරෙන ඕනෑම නඩුවක් සඳහා තම පෞද්ගලික මුදල් වැය නොකොට ක්‍රිකට් ආයතනය මගින්ම නීතිඥ ගාස්තු ගෙවීමත් සිරිතක්.

උදාහරණයක් ලෙස ප්‍රධාන විධායක නිලධාරියාට එරෙහිව එහි හිටපු ලේකම්වරියක විසින් පනවන ලද ලිංගික අල්ලස් ඉල්ලීමක් ගැන නඩුවටද ඔහු වෙනුවෙන් පෙනී සිටින්නේ ක්‍රිකට් ආයතනයෙන් ගෙවන නීතිඥ වරුන්‍ ය.

මේ වන විට හිටපු උප සභාපති වරයකු විසින් වත්මන් ක්‍රිකට් බලධාරින්ට එරෙහිව ශ්‍රේෂ්ඨාධිකරණයේ පවරා ඇති නඩුවකට ක්‍රිකට් ආයතනය වෙනුවෙන් කතා කරන්නේ මෙරට ඉහළම නීතිඥ ගාස්තු අය කරන ප්‍රසිද්ධ නීතිඥවරුන්‍ බව වාර්තා වෙනවා. එම ගාස්තු මෙහි ඇතුළත් නොවන්නේ ඒ 2025 වසරට අයත් වන නිසයි. මේ කතා ඇහෙන කොට නඩුත් හාමුදුරුවන්ගේ, බඩුත් හාමුදුරුවන්ගේ යන පැරණි කියමන මතක් වෙනවා.